講起去旅行，星加坡從來都不是我的首選什至次選地方．計劃下半年會攪個家庭之旅去日本，於是上半年可以去個短線遊．雖然我是泰國 big fans，奈何ｋ唔係． 星加坡近年大興土木，建了好些新景點．環球影城，金沙附近的沿海灣路線，望落都幾吸引，加上ｋ喜歡睇建築，於是出現了這個星加坡四天遊．
星加坡紙水貴，食貴住貴樣樣貴，都係我一直唔去星加坡既原因之一．Package 唔平，找了一間近地鐵站的酒店 - Grand Park City Hall．五分鐘內可到逹地鐵 City Hall 站．行十多分鐘可到逹 Esplanade．
星加坡果然名不虛傳．由落機到過關到攞行李，全部好順暢，大約三十分鐘就上左的士入市區了．的士乾淨，司機算是斯文有禮，帶給我們一個非常好的第一印象．由機場入市區，沿途景色不錯，右面是好多好大棵粗壯的樹，樹葉草地的綠色是很深的翠綠；左面是長長的海濱（照旅遊書說應該是 east coast）．好靚，感覺不錯．
酒店大堂ＯＫ，不過未有房．我地放低行李食個 late lunch．原本打算在香港訂好無招牌賀ｋ生日．點知打來打去都無人聽，上佢website又唔work．把幾火，心有不甘，於是下午二點幾行去 Esplanade 個間無招牌．由酒店行去其實一點都唔遠．途中經過一個大草地，正有足球比賽進行中，個草地你望落去已經感覺到ｄ草好靚生得好好，摸落去係好舒服．有些人一踏上草地就脫下鞋子，赤著雙腳走過草地，ｋ急不及待成個人瞓上去．
Esplanade 就是那兩個銀色瞓在地上的大樹菠蘿．其實佢本身係一個文化中心，外型又cyber，那些尖剌全部可以調校角度，呢個組合幾得意．走出 Esplanade 然後左轉沿海行一會就會到逹無招牌．基本上怕訂位／難訂位的可以試試下午去，唔使預早計劃，位多到任座．
ｋ生日，叫了個乾燒伊面，加上那裡出名的胡椒蟹，ｋ另外叫了個咕嚕雞球，加一人一杯果汁，盛惠 S$156-． 胡椒蟹確實好好味，我倆連蔥都食晒．伊面都好好味，雞球係個錯誤，唔應該叫．果汁可以，不過太細杯了．這個价錢不便宜，不過個蟹係到依家都覺得好回味．
吃飽了，在沿海濱步道走了一回．坐在海邊遠望魚尾獅，吹著海風，望著當地人沿著海邊做著各種運動，各自樂在其中卻一點不擾人．我和ｋ討論了一會，都有點感慨．然後我們一直走，踏著那條市內的 formula 1 賽道，走到 Singapore Flyer （大摩天輪）下面，找到明天要坐巴士的地點就回酒店
那酒店大堂真的騙得下人，上到樓上其實好舊，我好少入到房試晒所有野，點知今次個花洒好細水，個厠所門仲關唔到，諗住打電話落去，連個電話都係壞既，出門咁多次都係第一次咁．即刻走落去要求換房．因為要即刻執房比我，要我等一個鐘．算，反正我地行完一輪又熱又累又加上今朝好早機，返上房瞓左一個鐘就有房換．真正的 settle down ，瞓醒有ｄ頭痛，坐地鐵出去烏節路行街街．在 313@Somerset 出左已經要揾野飲，係呢幾日既星加坡之旅我地係不斷咁飲野．好彩新鮮果汁確係 refreshing ，飲完精神晒．
ｋ不嬲都唔好行街 shopping，但今次竟然肯行，仲有收穫．不過其實烏節路既商塲同香港既分別都不大，都是那些見慣見熟的 brand，都是那些我們提不起興趣的商店，所以我地都係 target 揾野食．走到 Ngee Ann City 地庫找到旅遊書介紹的 Four Seasons Durians，佢個 Durian Pancake really nice ！很香濃很滑，ｋ被迫試了一口．
最後，趕及十點前去到 ION Orchard 既foodcourt 食晚飯．一人叫左個魚蛋河加炸魚餅．魚蛋彈牙有魚味，攪到最後 encore 多個魚蛋撈面．好滿足咁抱住個肚返酒店．酒店附近有間７仔，每晚都係佢度買好多野返去酒店飲．
沒有留言:
張貼留言