2011 年 9 月 15 - 大沼
昨晚睡到半夜，覺得Ｋ在輾轉反側，半夢半醒記得好像沒有把護身符放在枱面，便起身放好再睡。後來Ｋ才跟我說，那晚睡到半夜，他覺得有＂野＂在床單下刮了他一下，嚇到佢成個清醒晒，佢無即時講比我知，怕我知道後會驚。不過放了護身符後好似又無乜問題，於是就無再講。不過這間酒店，以後就可免則免了。
講返今日既行程主要係一個，大沼。
讓我們有足夠體力遊玩這個國家公園，我們去了只五分鐘腳程的函館朝市食早餐，我們選了馬子，叫了每人一個海鮮丼，早餐食海鮮丼，真係自己都覺得誇張。
搭ＪＲ去大沼只需要三十分鐘。大沼係一個湖，一個好大既湖，周圍係森林，踏單車遊大沼係一個幾好既遊覽方法。
租車店員工給了我們一份大沼的地圖，又指手畫腳的教我們從那裡開始．好耐無踏過單車，開始時有點雞手鴨腳，加上沿途一路都好唔似國家公園，又無其他遊客，心裡面已經開始諗，死啦，唔係蕩失路呀？！好在後來見到一對上了年紀的當地人夫婦，心安定了些．再走不多遠，終於到逹第一個景點，我地兩個真係係度嘩嘩聲，第一時間放低單車衝落去．又要讚下日本人的細心，佢地係大沼湖既唔同位置劃了一些 check point，這些位置，你可以極近距離接觸這個湖及它的周邊植物，而且仲有比遊人放低單車的車架．Ｋ最鐘意這些郊外野，個湖好大好靚好平靜．
一路踩呀踩，一直踩到一個 camp site，Ｋ真係開心到癲左．本身佢鐘意露營，日本野本身設計精緻，佢以前又成日睇日本既 outdoor 雜誌，好恨好似雜誌咁去露營，今日終於比佢睇到真實情況．情形係一大片草地，邊邊有個大沼湖，有個小型的木製碼頭仔，有人帶齊工具係度畫畫，有人係度野餐，仲有枱同椅，係真係好似屋企咁樣既枱椅 size ，放係其中一個 tent 裡面．．．我係覺得好豪華既一種露營．我地係呢度留左好耐先繼續上路．
走不遠，就見到個牌寫住”熊出沒注意”．坦白講，心裡開始發毛．跟住仲聞到有便便既味道，會唔會熊人啱啱係附近方便完呢？
死啦，附近有熊人？好惊．跟住腦裡面出現左好多想法，如果真的有熊人跑出來，咁點算呢？我係唔係可以踩得快過熊人呢？（但其實熊人係跑得好快既動物）咁點樣可以等Ｋ走得甩呢？點呢點呢？一路諗一路惊，於是愈踩愈快．當然，好彩最後都無事．
還車時才知道己經踩左三個鐘，貌似樓南光的店員幫我地還車，好熱，於是試了個蜜瓜味雪糕，在北海道好似無時無刻都想食雪糕．
回到函館，肚子在叫，竟然兩個都想 encore 那個龍鳳拉面，北海道咁多野食，我地都要食多次，可想而知係幾咁好味．
回酒店小休途中，我地經過一間好出名的甜品店 Snaffles. 旅遊書說她們的芝士蛋糕好出名, 雖然 k 並不好甜品, 都唔理咁多買了兩個返酒店試試. 我本身唔係好鐘意重芝士味既蛋糕, 但呢款郤感覺輕盈, 好香芝士味. 去函館既朋友真的要試試, 誠意推介.
在酒店小睡了個幾鐘, 精神回復了不少. 出發往金森倉庫羣. 第一次坐電車, 因為唔知點樣買票 (當年去美國時搭巴士既童年陰影) 感覺有些緊張. 電車上就是日劇裡的塲景, 只是沒了電車男. 反而去到金森倉庫有點失望, 簡單來說就是活化了的舊貨倉裡面開了不同的食店和手信店. 我們對此興趣不大, 走不了多久就離開了. 反正夜裡的函館沒什麼好做, 我們散步回到酒店附近決定去食晚飯. 路上都有幾個人在街上宣傳他們的食店, 都是些居酒屋之類.
我們最後在大門橫丁隔離找到間手打蕎麥面店, 一對上了年紀的夫婦主理. 太太笑容滿面, 大叔一面嚴肅. 我們叫了一人一份的手打簥麥面. 我的是女仕 special, 上面有些炸了的真花, 好靚又好味. 大叔見我們吃得差不多了, 拿了一壺東西放在我們枱上, 我地之前都見其他食客都有這個壺, 就是不知內裡有什麼. 大叔見我地兩個大鄉里, 一面古古怪怪地笑一面示意我地飲, 做遊客, 反正不怕做蠢事, 飲就飲. 當時我地真係唔知飲緊乜. 後來返香港睇書先知原來係煮簥麥面既水, 係店家覺得自己用既水同面都好靚先會用來奉客. 走既時後, 同大叔講了句 "O-I-SHI" 我係真心既, 大叔也笑了, 都是由心的. 個一刻我相信大家都係真心, 感覺很暖呀.
